वृत्त - हिरण्यकेशी

वृत्त : हिरण्यकेशी

लगावली - 

लगालगागा लगालगागा लगालगागा लगालगागा 

(मात्रा:३२)

सुखा मिळविण्या किती पळापळ 

उगाच म्हणती सुखास मृगजळ

इथे तिथे सुख विखूरलेले 

जमवत जा तू भरेल ओंजळ

सुखास जर तू बसशिल शोधत

विसरुन जाशिल जगावयाला

तुझ्याचपाशी तुझेच सुख रे

अप्राप्य ना सुख कळेल तुजला

निसर्ग देतो अनंत हस्ते

उचलुन घे तू तुला हवे ते

सुखात सामिल जगास कर तू

नभात साऱ्या फिरेल सुख ते

तुझ्याचपुरते नको जगू तू

विशाल अंबर कवेत घे तू

सवंगडी जग बनेल जेव्हा

सरी सुखाच्या अनुभवशिल तू

जरा हवे दुःखही चवीला 

नकोच रे फक्त सुख जगाया

झकास लज्जत नव्या चवीची

तुलाच लागेल आवडाया

✍जयश्री अंबासकर 

३० नोव्हेंबर २०२०