वृत्त - सौदामिनी

वृत्त  - सौदामिनी

लगागा लगागा लगागा लगा 

तिने मुक्त व्हावे, जगावे पुन्हा

करारी वगैरे दिसावे पुन्हा

नव्या पिंजर्‍याची पुरे कौतुके

किती बंदिवासात रावे पुन्हा

पुन्हा कृष्णबाधाच व्हावी मना

जिणे मोरपंखी मिळावे पुन्हा

अपेक्षाच दुःखास कारण तुझ्या

कितीदा तुला समजवावे पुन्हा

तिचे हासणे आज दुबळे पुन्हा

तिच्या सोसण्याचे पुरावे पुन्हा

शरीरावरी यातनांच्या खुणा

खुलासे जगा काय द्यावे पुन्हा

अकस्मात येणे सुखाचे नको

जुने दुःख खुश्शाल यावे पुन्हा

जयश्री अंबासकर