वृत्त - मध्यरजनी
लगावली - गालगागा x ४
साद घालुन अंबराला सोनपिवळी सांज गेली
चंद्रआतुर आसमंता जाग आली रात्र झाली
नादमधुरा पावलांची मस्त मोहक देहबोली
तारकांच्या पैंजणांनी चंद्रवर्खी रात्र झाली
चंद्र संमोहन जगावर रातराणी झिंगलेली
शबनमी ह्या चांदव्याने चिंब ओली रात्र झाली
चाहुलीने भास्कराच्या भैरवीची वेळ झाली
चांदव्याच्या मैफिलीची सांगतेची वेळ झाली
जयश्री अंबासकर
#गोदातीर्थ_उपक्रम
No comments:
Post a Comment