आता असे करूया

तरही गझल 

(मिसरा - सुरेश भट)

(नाही म्हणावयाला आता असे करूया)

जे आजवर उधळले  ते आज सावरूया

आहे बरेच काही हातात या घडीला

विनियोग या घडीचा थोडातरी करूया

आनंदकण जरासे शिंपूनिया बघूया

दुःखात जे तयांच्या झोळीत सुख भरूया

हातातुनी निसटले आयुष्य वाळुपरि ज्या

हातात त्या सुखाची ओंजळ नवी धरूया

घालून मुखवटा तो सर्रास जे मिरवती

त्यांच्या समोर आता चल आरसा धरूया

तो चंद्र, चांदणे अन् त्या तारका नकोशा

पोटात आग आहे  चल भाकरी स्मरूया

पाऊल अडखळोनी पडलो जिथे जिथे मी

ती वाट सोबतीने चल एकदा धरूया

तो एकदाच आला क्षण धुंद मीलनाचा

बाकी नकोच काही क्षण फक्त तो स्मरूया

ओसाड माळरानी एकांत आंथरूया

अन् चांदणे गुलाबी खुश्शाल पांघरूया

✍जयश्री अंबासकर