वृत्त - उध्दव
मात्रा २+८+४
तोडून शृंखला बोजड
मी मुक्त मोकळी झाले
हा समाज आता म्हणतो
बेछूट स्वैर मी झाले
हे मनाप्रमाणे जगणे
नाहीच कुणाला रुचले
मग विशेषणांची यादी
घेऊनच मी वावरले
मी पर्वा नाही केली
जग अधिक विखारी झाले
वाळीत टाकल्यावरती
ते शांत जरासे झाले
या परंपरेच्या बेड्या
का तिच्याच पायांसाठी
निर्बंध अघोरी सगळे
का पुरुषी सत्तेसाठी
बेटावर माझ्या आता
मी श्वास मोकळा घेते
अन पंख पसरुनी माझे
मी गगनभरारी घेते
✍जयश्री अंबासकर
No comments:
Post a Comment