वृत्त - मंजुघोषा

वृत्त – मंजुघोषा
गालगागा गालगागा गालगागा

सांगता होते दिसाची सांज येता
सांजही जाते लयाला रात्र येता
चक्र हे चाले निरंतर जीवनाचे
उगवतो कोणी कुणाचा अस्त होता

खेळ हा चालूच असतो जीवनाचा
एक जातो एक येतो वेळ येता
थांबते आयुष्य ना रेंगाळतेही
वेग मंदावतहि नाही दु:ख होता

अटळ आहे खेळ हा जर माणसाला
खेळताना का करावी व्यर्थ चिंता
सोपवू कोणा सुकाणू प्रश्न नसतो
तोच सांभाळी सुकाणू तोल जाता

जयश्री अंबासकर
३ ऑक्टोबर २०२०