वृत्त - कलिंदनंदिनी
लगालगा लगालगा
लगालगा लगालगा
फिरून भेट जाहली
उभी पुन्हा समोर ती
तसाच लुब्ध मी तिथे
अधीर स्पंदने किती
तशीच मिश्किली तिची
खट्याळ तेच हासणे
तिलाच शोभते असे
जहाल थेट बोलणे
तशीच ती झऱ्यापरी
खळाळती अजूनही
तशीच ती विजेपरी
सळाळती अजूनही
कट्यार वार दृष्टिचा
तसाच तीक्ष्ण भासतो
क्षणात वेध घेऊनी
उरात घाव कोरतो
तशीच बेफिकीर ती
तशीच मुक्त आजही
वसंत पाहतो तिचा
दुरून फक्त आजही
जयश्री अंबासकर
No comments:
Post a Comment