वृत्त - देवराज

वृत्त - देवराज
गालगाल गालगाल गालगाल गालगा

ना समेट ना क्षमा न कोणतीच शक्यता
कोणता दुवा न आज ना तहास मान्यता
ऐकले तुझे किती न ऐकणार मी अता
ऐकणार फक्त तू सुनावणार मी अता

घाव रोज जे दिलेस तेच आठवून मी
विस्तवास आतल्या जपेन चेतवून मी
आग अंतरातली जिवंत ठेवणार मी
तीच आग घेउनी करेन भस्मसात मी

डावपेच तेच ते फुशारक्या तुझ्या किती
का समोरुनी लढावयास वाटते भिती
आखलास व्यूह तू जरी कुटील घातकी
भेदणार मीच ओळखून चाल बेरकी

वार फक्त सोसले अता न सोसणार मी
शस्त्र पारजून यापुढे असेन सज्ज मी
आपले हिशेब सर्व चोख फेडणार मी
एक एक डाव घेत युध्द जिंकणार मी

जयश्री अंबासकर