वृत्त - सुमुदितमदना

वृत्त – सुमुदितमदना

मात्रा – ८ ८ ८ ३

रंगमहाली वाट पाहते भरून हिरवा चुडा

क्षण मज भासे युगासारखा उशीर का एवढा

या देहाची मैफिल अवघी तुझ्याचसाठी प्रिया

स्वप्न पाहते संसाराचे खुलते माझी रया

सोळा श्रृंगारांनी सजले घमघमतो केवडा

ओसंडुनिया पहा वाहतो सौंदर्याचा घडा

किती काळ मी कुडीत वणवा सुलगत ठेवू असा

तरूण आहे स्वप्न तोवरी ये ना तू राजसा

प्रतिक्षेत मग जाळत गेल्या दाहक रात्री अशा

किती मैफिली सजवत राहू देहाच्या मी अशा

जीवापाड मी प्रेम करावे असा नसे का कुणी

करेल का स्वीकार कुणी हा माझा जागेपणी

ओसरलेली मैफिल करते केविलवाणी दशा

सैरभैर मग फरफटलेल्या भरकटलेल्या दिशा

जीव नकोसा जरी वाटतो जगावेच लागते

रुक्ष कोरडे जीवन ओझे ओढावे लागते

कधीतरी मग ऐकू येतो मंजुळ पावा तुझा

ओढ लागते पैलतिराची ध्यास जिवाला तुझा

तगमग थांबुन देहाची या मना मिळे शांतता

भोगसोहळ्यातुनी होतसे देहाची मुक्तता

✍जयश्री अंबासकर

#गोदातीर्थ_उपक्रम