वृत्त – अनलज्वाला
मात्रा – ८ ८ ८
कणाकणाला व्यापुन उरते तुझी आठवण
आई मजला व्याकुळ करते तुझी आठवण
आयुष्याला कवेत घेते तुझी आठवण
भिजल्या डोळ्यातुन पाझरते तुझी आठवण
चुकते जेव्हा रागे भरते तुझी आठवण
प्रेमाचेही शिंपण करते तुझी आठवण
अधिकाराने विचारतेही तुझी आठवण
कर्तव्याची जाणिव करते तुझी आठवण
पळापळीने दमून करते तुझी आठवण
श्रांत मनाला मग सावरते तुझी आठवण
संयम, शांती रोज शिकवते तुझी आठवण
सदा यशाचे कौतुक करते तुझी आठवण
आई झाले आता अधिकच तुझी आठवण
लेक होउनी कुशीत शिरते तुझी आठवण
जयश्री अंबासकर
No comments:
Post a Comment