तू दिलेल्या वेदना

माझी ही गझल मायबोलीच्या प्रातिनिधीक गझल संग्रहासाठी निवडल्या गेलीये.   

तू दिलेल्या वेदना मी गात नाही

ती उधारी चुकविणे नशिबात नाही

पेलणे गांडीव तुजला शक्य नाही

मनगटी दुबळ्या तुझ्या ती बात नाही

भोगण्याचा शाप आहे नंदिनीला

आजही का आग प्रतिकारात नाही

जी नशा युद्धातल्या मरणात आहे

ती नशा लाचार या जगण्यात नाही

उंब-याशी थांबले पाऊल माझे

स्वागताला आसवे दारात नाही

का जपावे व्यर्थ मी झोळीस माझ्या

आज पुरते दु:ख ही पदरात नाही

जयश्री