नव्या वर्षाच्या नवसूर्याचं तेज
नव्या, विचारी, संस्कारी पिढीच्या हातात
ठरवायचं सगळं तुम्हीच
दुबळे, षंढ बाहु की जोर मनगटात
भ्रष्टाचाराच्या गर्तेत भिरभिरायचं
की पेटवायच्या उत्कर्षाच्या मशाली
ठरवायचं सगळं तुम्हीच
सार्या दुनियेचं भवितव्य आहे तुमच्या हवाली
जुन्या रुढी, परंपरांचं काळं खिन्न आभाळ
की नव्या विचारांची सुंदर, रंगीत सकाळ
ठरवायचं सगळं तुम्हीच
इतिहासाची दलदल की भविष्याची विजयी माळ
पेटून उठायचं अन्यायाच्या ठिणगीतून
की बसायचं पाठीचा कणा मोडून
ठरवायचं सगळं तुम्हीच
उठा....आता चालणार नाही फार उशीर करुन
जयश्री
