पण तो आता परका होता

प्रसंग मोठा बाका होता

मारेकरीच काका होता

कळले आधी म्हणुन थांबला

वळणावरती धोका होता

पावसातली भेट अचानक

पण तो आता परका होता

त्याच्यासाठी काळजातला

चुकला माझा ठोका होता

जखम लागली पुन्हा भळभळू

एक उसवला टाका होता

जवळपास मी सदा रहावे

एकच त्याचा हेका होता

आनंदी आहेस ना अता?

प्रश्नच त्याचा तिरका होता

आयुष्याच्या संध्याकाळी

परिसर ओकाबोका होता

✍️जयश्री अंबासकर