Friday, October 22, 2021

वृत्त - देवराज

वृत्त - देवराज
गालगाल गालगाल गालगाल गालगा

ना समेट ना क्षमा कोणतीच शक्यता
कोणता दुवा आज ना तहास मान्यता
ऐकले तुझे किती ऐकणार मी अता
ऐकणार फक्त तू सुनावणार मी अता

घाव रोज जे दिलेस तेच आठवून मी
विस्तवास आतल्या जपेन चेतवून मी
आग अंतरातली जिवंत ठेवणार मी
तीच आग घेउनी करेन भस्मसात मी

डावपेच तेच ते फुशारक्या तुझ्या किती
का समोरुनी लढावयास वाटते भिती
आखलास व्यूह तू जरी कुटील घातकी
भेदणार मीच ओळखून चाल बेरकी

वार फक्त सोसले अता सोसणार मी
शस्त्र पारजून यापुढे असेन सज्ज मी
आपले हिशेब सर्व चोख फेडणार मी
एक एक डाव घेत युध्द जिंकणार मी

जयश्री अंबासकर

Thursday, October 14, 2021

परतीचा पाऊस


हिरे मोतियाची हौस 
पुरवतो हा पाऊस 
कशी साठवून ठेवू
परतीचा मी पाऊस 

जयश्री अंबासकर 

#माझी_फोटोगिरी 
#सुबहकेनजारे

Monday, October 04, 2021

वृत्त - जगदीश्वरबाला

वृत्त : जगदीश्वरबाला
मात्रावली - २ ६ ऽऽ ८ ४

गोजिरवाणी ऽऽ गोंडस माझी छकुली
कळले कधी ऽऽ केव्हा मोठी झाली
आभाळ नवे ऽऽ शोधत थेट निघाली
बघता बघता ऽऽ भुरकन उडुनी गेली

आकाशाला
ऽऽ अता गवसणी घाली
मज आठवते ऽऽ अजुनी बोबड बोली
नव क्षितिजाची ऽऽ ओढ तिच्या पंखांना
होती रडली ऽऽ शाळेला जाताना

अंगण अजुनी ऽऽ तिच्या सयीतच रमते
आई-आईऽऽ लाघव हाळी घुमते
होईल कधी ऽऽ फिरुनी ते बागडणे
वाचून तिच्या ऽऽ घरटे केविलवाणे

भेटेल तिला ऽऽ राजसवाणा कोणी
नेईल तिला ऽऽ बनवुन त्याची राणी
होतातच का ऽऽ लेकी भरभर मोठ्या
जातातच का ऽऽ सोडुन अपुल्या घरट्या 

जयश्री
अंबासकर