दरवळते आहे
तोच प्रश्न घेऊन उराशी उगाच का तळमळते आहे
उत्तर माहित असूनसुद्धा प्रश्नाशी अडखळते आहे
एक पाखरु गोंडस हसरे केव्हाचे भिरभिरते आहे
क्षणात इकडे क्षणात तिकडे मनामधे सळसळते आहे
सांज केशरी ढळतानाही आनंदी गुणगुणते आहे
मनी मानसी गंध कस्तुरी कुरवाळत दरवळते आहे
गालावरती सलज्ज गहिरी उमलुन लाली खुलते आहे
अधिर यामिनी चंद्रासोबत खिडकीशी घुटमळते आहे
वाट पाहुनी, कूस बदलुनी रात्र गुलाबी छळते आहे
स्वप्नामधल्या स्पर्शलाघवी मिठीत मी विरघळते आहे
जयश्री अंबासकर
No comments:
Post a Comment